خبرگزاری دولتی باختر به نقل از وزارت کار و امور اجتماعی طالبان گزارش داده است که این وزارت، پنجم فروردین را «روز دهقان» اعلام کرده است.
در گذشته روز اول سال خورشیدی، جشن نوروز بود و دوم حمل به‌عنوان «روز دهقان» تجلیل می‌شد. طالبان اما جشن نوروز را از تقویم افغانستان حذف کرده است.
در سال‌های گذشته جشن نوروز توسط حکومت در کابل و یا هم ولایت بلخ در شمال کشور تجلیل می‌شد.
ذبیح‌الله مجاهد، سخن‌گوی طالبان به رسانه‌ها گفته است که حکومت این گروه از نوروز تجلیل نمی‌کند؛ اما مانع برگزاری مراسم نوروز هم نمی‌شود.
به‌نظر می‌رسد امسال نوروز توسط شهروندان کشور هم تجلیل نشده است. در گذشته شهروندان کشور به‌گونه‌ی گسترده در مراسم جهنده بالا در روضه سخی، آرمگاه منسوب به «حضرت علی» در مزار شریف در مرکز ولایت بلخ و زیارت سخی در کابل شرکت می‌کردند.
نوروز از جشن‌های باستانی به‌شمار می‌آید که در حوزه‌ی تمدنی مشترک در کشورهای ایران، افغانستان، تاجیکستان، آذربایجان و دیگر نقاط جهان گرامی داشته می‌شود.
یادمان هست که صداوسیمای ما هم سالهوی طولانی سعی در کمرنگ کردن نوروزداشته است....